سقف عواطفنا .. مضـ(حك)ــ(لم)

غباء !! حمق عاطفي !! شنوا يتسمى هو ! مانعرش كان عندو صياغة ولاّ إصطلاح لغوي، اما نتصور اي واحد في لحظة من لحظات انسجام قدام مشهد رومنسي من فيلم ولاّ مسلسل ولاّ كليب ولا غيرو، يسإل هاك السؤال لي سألاتو Mila Kunis في فيلم  #Freinds_with_Benefits  "علاش ما يعملوش فيلم يبدى بعد البوسة؟" و يتأكد انو مخيالنا البشري للعاطفة، يحبس ثم بالضبط في الوقت اللي يتلاقى فيه الحبيب بمُجيرتو ، وتكون هاك البوسة ولاّ الارتباط بمثابة لافتة تنبيهية لنفاذ صلوحية الشعور في المشهد، ودعوة ضمنية لتوكيلك انت مهام استنباط صيغة تراها تليق باللي عجز فيه المخرج والسيناريست باش يوصلوا للمتابع ع اللي شينجّم يكون بعد هاك البوسة ولاّ هاك الارتباط !!
علاش ماثماش حد أدنى م الذكاء العاطفي يتلافو بيه عجزهم في انهم يحافظو على مستوى هاك الانسجام عند المشاهد، وما يضطروش كل مرة يرمولو الكورة، هاك، هاذاكا سقف آفاقناو توقعاتنا لشعور إسمو حب !! تسإل، اما ما تلقى حتى اجابة تنجم تكون مقنعة اكثر من إجابة Justin Timberlake ليها في نفس الفيلم : " عملو افلام، افلام البورنو بالطبيعة" .